ACESS A PEI
- Via naven da Curaglia / mira carta / profil d’altezia (1.5 uras)
Via naven da Mustér/ mira carta / profil d'altezia (2.5 uras)
Via naven da Sedrun /mira carta / profil d'altezia (2.5 uras)
La stad: Igl ei pusseivel da contonscher l’Academia Vivian neu da treis varts. Tgi ch’ei sin viadi cul traffic public sa ascender navenda Curaglia (1.5 uras) Sco alternativa san ina prender ina via che meina sur ina punt pendida (mira carta). Naven dallas staziuns da Mustér (via Mompé Medel) ni Sedrun (via Cavorgia) han ins circa 2.5 uras entochen la camona. Tgi che ei da viadi cun auto sa schar quel u a Mompé Medel ni a Mutschnengia e cuntinuar naven da leu a pei (mintgamai ca. 45 min.)
Igl unviern: Per igl access cun genelas cusseglein nus la suandonta via. Tgi che vul ascender naven da Mompé Medel – quei ei il bia pusseivel era senza genelas – sa prender la via da spassegiar digl unviern. Quella entscheiva alla fin dil vitg tiel plaz da semanar encuter vest. Quella via ei medemamein igl access per la via da scursalar da Mompé Medel. Cuntinuei pia quella via entochen in plaz da grillar, leu entscheiva era la via da scursalar. Naven da leu semplamein ir agradora vinavon sin la via entochen che Vus vesis l’Avademia Vivian silla vart seniastra.
L’ACADEMIA VIVIAN – INA SCOLA D’UAUL ED IN LIUG DA SENTUPADA
Enamiez igl uaul da badugns sur Mustér stat dapi la stad 2014 in baghetg solid da lenn – l’academia Vivian.
Ella ei ina scola d’uaul, ina stiva cumadeivla ed punct da partenza per differentas excursiuns tier ils temas uaul, selvaschina ed natira en ina. In liug, nua che indigen e jaster sa guder la ruasseivladad dalla natira.
L’idea per la construcziun dalla Academia Vivian ei sesviluppada el ravugl dils bostgers. La finamira da quest project ei da promover igl uaul sco liug da scolaziun e da pratica.
Ei fuva las vischnauncas da Mustér, Tujetsch e Medel, sco era da Sumvitg, Trun e Breil, che han pussibilitau la realisaziun dil project Academia Vivian. Finanzialmein ei il project vegnius sustenius dalla „Schweizer Berghilfe“ sco era dil cantun e la confederaziun.
Il biro d’architectura guian + pally architects sa dad Igis/ Curaglia ha designau la casa: Il baghetg regorda vid ina plonta dada per tiara. Igl uaul entuorn la Academia Vivian ei vegnius destruius cumplettamein digl orcan vivian avon 25 onns. Oz ei la tegia circumdada d’in prospiront uaul giuven
La lenna che ei vegnida duvrada per la construcziun dil baghetg deriva dils uauls dallas vischnauncas vischinontas. La quantitad da pégn, larisch ed schiember ein vegni duvrai en medema relaziun sco quei che ellas creschan els uauls. La lenna ei vegnida elaborada a Curaglia. Las slondas cun las qualas l’Academia Vivian ei cuvrida ein vegnidas fatgas en collaburaziun cun in taglia slondas pensiunau sco era emprendists da bostger dallas vischnauncas. La casa ei vegnida inaugurada igl atun 2014.
Dapi 2015 meina il center sursilvan d’agricultura a Mustér l’Academia Vivian e sviluppescha il cuntegn e las purschidas da quei project.
